पिर नगर

पिर नगर प्यारी छिट्टै लिन आँउछु
तेरै नाम भाकल गरी गुम्बा मन्दिर धाँउछु

घाँस दाउरा मेला पात रोपाईंमा जाँदा
पलपल ढुकढुकी भित्र म नै छाँउछु

रातो सारी चुरा पोते पनि हेर्दै गर्नु
छानी छानी किन्नलाई पैसा पठाँउछु

त उता म यता छट्पटीमा कराउँदा
मनमनै जीवन्त प्रेमगीत गाँउछु

कहिले आउला भेट्ने त्यो शुभ दिन
कल्पिएर एकाएक आफैंमा रमाँउछु

भूकम्पले जिर्ण भएको मेरो देशमा 

आशा र संभावनाको दीप बालिदेउ 

प्याक प्याक्ति मुख बाइरहेका

काकाकूलका देहमा अमृत छरिदेउ

साना तिना झिना मसिना कुराहरुमा 

अल्झिरहेका ठूला ठूला देवहरुसमक्ष 

शान्ति, मेलमिलाप र राष्ट्रियताको 

मेघ गर्जनले पंचजन्य संख फुकिदेउ 

नांगिएका वन पाखा , उदांगिएका बस्तीहरु 

भू माफिया र प्लटिंग सम्राट बिरुद्ध 

जगमगाई उठ्न र प्रकृतिसंरक्षणमा 

प्रेरित पार्दै सबैलाई उक्साइदेउ 

ओठे बोली मात्र हैन काम  गर्ने 

हौसला र प्रेरणा प्रदान गरिदेउ 

कुवा बनाउने घाँसी मात्र हैन 

मनमा बस्ने भानुभक्त जन्माइदेउ।